Shahid Babul
بچپن کی خواہشیں
یوں تو بچپن میں میری والدہ میری ہر ضرورتوں کو میرے کہنے سے ہی قبل از وقت پورا کر دیا کرتی تھیں اور اگر کبھی کسی چیز کی خواہش کرتا بھی تو وہ اسی وقت پوری ہو جاتی شاید یہی وجہ تھی کہ مجھے کبھی اپنی والدہ سے ضد کرنے کی عادت نہ تھی یہ ان دنوں کی بات ہے جب میں دوسری جماعت کا طالب علم تھا اور اس وقت میری عمر لگ بھگ سات برس تھی جب پہلی بار میں اپنی کلاس کے ایک دوست کے گھر اس کے ساتھ کھیلنے کے لیے گیا تھا اس کے گھر میں ایک رنگین ٹی وی تھا جس پر وہ اکثر اٹاری گیم لگا کر ویڈیو گیم کھیلا کرتا تھا اس نے اپنا ٹی وی آن کیا اور گیم لگا کر ہم دونوں گیم کھیلتے رہے شام کو جب میں اپنے گھر لوٹا تو میں نے اپنی امی جان سے گیم دلانے کی خواہش کی تو انہوں نے مجھے کہا کہ وہ اگلے ہی مہینے اپنی تنخواہ سے وہ گیم ضرور خرید کر دلائیں گی جس پر میں نے انکار کرتے ہوئے فورا وہ گیم دلانے کی ضد شروع کردی امی جان نے جلدی جلدی اپنا کام ختم کیا عشاء کی نماز ادا کی اور ابایا پہن کر بس اسٹاپ کا رخ کیا کچھ ہی دیر بعد بس آئی تو ہم بس میں سوار ہو کر صدر کے مارکٹ پہنچے اس وقت سردیوں کی سخت رات تھی اسی لیے بازار بھی اپنے معمول سے پہلے بند ہو چکا تھا اور ہم بازار سے خالی ہاتھ گھر لوٹے اگلے روز جب میں اسکول سے گھر آیا تو گھر پر تالا لگا تھا امی جان بازار گئی ہوئی تھی تو میں نے اپنے چابی سے گھر کھولا بستہ رکھا کھانا کھایا اور مدرسے چلا گیا شام کو جب میں گھر واپس آیا تو امی جان کچن میں کام کر رہی تھی میں نے امی جان کو سلام کیا اور کمرے میں داخل ہوگیا جیسے ہی میں اپنے اسکول کا ہوم ورک کرنے کے لیے بستے کی اور بڑھا تو سامنے ایک بڑا سا تھیلا رکھا ہوا تھا جب میں نے اس تھیلے کو اُٹھا کر کنارے پر رکھنے کی کوشش کی تو اس میں مجھے ویڈیو گیم نظر آیا جس کے لیے میں پچھلی رات اپنی امی سے ضد کرتا رہا۔۔۔ جیسے ہی میں نے تھیلے سے اپنے گیم کو نکالا تو میری آنکھوں میں خوشی کی لہر چمک پڑی اور میں نے فوراً جا کر اپنی امی جان کو گلے لگایا اور ان کا شکریہ ادا کیا پھر ماں نے مجھے دو بوسے دیے اور اپنے کام میں مصروف ہو گئیں۔۔۔
آج سولہ سال بعد میرے دونوں چھوٹے بھائیوں نے مجھ سے صدر آنے کی ضد کی تو میں نے انہیں انکار کر دیا جس پر انہوں نے امی جان سے کہا کہ وہ انہیں بازار لے چلیں تو امی جان نے جلدی جلدی اپنا کام ختم کیا عشاء کی نماز کے بعد وہ بازار کے لیے تیار ہو گئی اور پھر مجھے ان کے ساتھ بازار آنا پڑا۔۔۔
آج جب ہم صدر پہنچے تو راستے کی وہ سرد ہوائیں اور بازار کی بند دکانوں نے مجھے میرا بچپن یاد دلا دیا۔۔۔
آج بہت عرصے بعد احساس ہوا کہ ماں آخر ماں ہوتی ہے وہ اپنے اولاد کی خوشی کی خاطر رات اور دن کی پرواہ نہیں کرتی۔۔۔
وقت کے ساتھ بچے بڑے ہو جاتے ہیں اور اپنے ماں باپ سے دور ہو جاتے ہیں لیکن ماں کبھی اپنے بچے کو خود سے دور نہیں ہونے دیتی
جب بچے جوان ہو جاتے ہیں تو ان کے پاس ماں باپ کے لیے وقت نہیں ہوتا لیکن والدین اگر بوڑھے بھی ہو جائیں تو ان کے پاس اپنے اولاد کے لیے ہمیشہ وقت ہوتا ہے
اللہ تمام والدین کو نیک صالح اولاد عطا کرے اور تمام اولادوں کو فرمانبردار بنائے ۔۔۔ آمین
Comments
Post a Comment